Выстава «Мастакі на вакацыях»

Описание

12 снежня ў 2-й зале выставачнага корпуса Нацыянальнага мастацкага музея Рэспублікі Беларусь адкрываецца выстава «‎Мастакі на вакацыях». У экспазіцыі паказаны жывапісныя, графічныя і скульптурныя работы з фондаў музея, створаныя беларускімі мастакамі падчас замежных вандровак.

Мастакі шмат падарожнічаюць, не развітваючыся з эцюднікам, шматлікія пейзажы і замалёўкі, прадстаўленыя ў экспазіцыі, створаны як падчас вандровак па маляўнічых кутках Савецкага Саюза, так і за мяжой. Творчасць стала непарыўным звяном у перадачы ўражання мастака аб краінах і культуры, архітэктуры, прыродзе, людзях і многім іншым, што так адрозніваюцца ад роднага краю і звычайнага ўкладу жыцця. Выстава раскрывае больш шырокае паняцце, чым водпуск і адпачынак, закранаючы як гістарычныя падзеі, так і асабістыя жыццёвыя абставіны, з-за якіх мастак апынуўся за межамі беларускай зямлі.

У экспазіцыі прадстаўлены творы многіх вядомых беларускіх мастакоў: Аркадзя Астаповіча, Івана Ахрэмчыка, Вітольда Бялыніцкага-Бірулі, Віктара Вярсоцкага, Яўгена Зайцава, Яўгена Красоўскага, Барыса Малкіна, Сяргея Селіханава, Уладзіміра Стэльмашонка і інш.